በጅቡቲ መፈንቅለ መንግስት ለማድረግ የጎረቤት አገር ጣልቃ ገብነት እንዳለ የደህንነት መረጃ አመለከተ።

ኢትዮ ሞኒተር፡ 19/05/2018፡- የጅቡቲ ብሔራዊ ደህንነት እና ፀረ-ስለላ ተቋም፣ በጎረቤት ሃገር በኩል የሚደራጅ እና በጅቡቲ ፕሬዚዳንት ኢስማኤል ኦማር ጊሌ ላይ ያነጣጠረ የመፈንቅለ መንግስት ሙከራ ሊደረግ እንደሚችል የሚያስጠነቅቅ “ሚስጥራዊ ሪፖርት” ለቤተ-መንግስቱ አቅርቧል።

ይህ የመፈንቅለ መንግስት ስጋት የውጭ እጅ እንዳለበት ቢጠቆምም፣ ለዚህ ምቹ ሁኔታን የፈጠረው ግን የጅቡቲ ውስጣዊ የፖለቲካ መፍረክረክ እንደሆነም እየተገለፀ ነው።

የፕሬዚዳንት ጊሌ አስተዳደር የሀገሪቱን መልክዓ-ምድራዊ አቀማመጥ ለውጭ ኃያላን የጦር ሰፈሮች በመቸብቸብ የኪራይ ገቢ እየሰበሰበ ቢሆንም፣ ይህ ሀብት ወደ ታችኛው ማህበረሰብ ሊወርድ አለመቻሉ በህዝቡ ቅሬታ እየተፈጠረ መምጣቱ መረጃዎች ያሳያሉ።

እንደ ምስጢራዊው ሪፖርቱ ከሆነ የአፍሪካ ቀንድ በአሁኑ ወቅት “የመንግስት መፍረስ ወረርሽኝ” እየተናጠው ይገኛል።

የጅቡቲው ስጋት ብቻውን የመጣ አይደለም የሚለው መረጃው፤ የቀጣናው ምስል እጅግ አስፈሪ እየሆነ መጥቷል ይላል።

ቀጣናው ድሃ ብቻ ሳይሆን፣ የውጭ ኃይሎች የሚጋፉበት፣ የተደበቀ ሀብት የሚታሰስበት እና አስቸጋሪ ጎረቤቶች የሚናቆሩበት “እምቅ ምድጃ” ሆኗል።

በጅቡቲ ጠባብ መሬት ላይ ብቻ ከ25,000 በላይ የውጭ ወታደሮች ሰፍረዋል፤ የድሮኖች በሰማይ ላይ መመላለስ እና የመርከቦች መጨናነቅ፣ የአካባቢው ህዝብ “ሀገራችን ተሸጠች” የሚል ቅሬታ እንዲያሰማ እያደረገ ነው።

ይህ የጅቡቲ የደህንነት ሪፖርት የሚያመላክተው፣ በአንድ ዋና ከተማ ውስጥ የሚከሰት ተቋማዊ ውድቀት ለሌላው የመፈንቅለ መንግስት “መነሻ” እየሆነ መምጣቱን ነው።

የውጭ ኃይሎች ጣልቃ ገብነት መፈንቅለ መንግስትን እንደ “ነጻነት ትግል” አስመስሎ ለማቅረብ እየተጠቀመበት ሲሆን፣ ሀብት ደግሞ ለዚህ ሴራ ማጣፈጫ እየሆነ ነው።

ጅቡቲም ከዚህ አዙሪት ውጪ አለመሆኗን ሪፖርቱ አረጋግጦ ከመፈንቅለ መንግስቱ ጀርባ ግን የጎረቤት ሃገርን እጅ በደማቁ እንደጻፈው ለመረዳት ተችሏል።

የተኛው ጎረቤት አገር የሚለው ግን በይፋ የወጣ መረጃ የለም።