ግብፅ ኢትዮጵያ የባህር በር እንዳታገኝ እንደምትሰራ አስታወቀች።

ኢትዮ ሞኒተር፡ 01/11/2017:  የግብፅ ፕሬዝዳንት አብዱልፈታህ አል ሲሲ የሶማሊያው ፕሬዝዳንት ሐሰን ሼክ መሓሙድ ባስተናገዱበት ወቅት ግብፅ ኢትዮጵያ የቀይ ባህርን ለማግኘት የምታደርገውን ጥረት ለመግታት እንደምትሰራ ቃል ገብቷል።

የሶማሊያ ሀይሎችን የማሰልጠን እና የፀጥታ አጋርነቷ ለማጠናከር እንደምትሰራም አረጋግጣለች። ፕሬዝዳንት አብደል ፋታህ ኤል ሲሲ ከሶማሊያው ፕሬዝዳንት ሀሰን ሼክ መሀሙድ ጋር ከተነጋገሩ በኋላ ለጋዜጠኞች እንደተናገሩት ካይሮ “የሶማሊያን ሉዓላዊነት ወይም የቀይ ባህር ኮሪደርን ደህንነት አደጋ ላይ የሚጥሉ እንቅስቃሴዎችን አትታገስም” ይህ የውሃ መስመር 10 በመቶ የሚሆነውን የአለም ንግድን ይይዛል ብሏል።

ማስጠንቀቂያው በጥር 2024 አዲስ አበባ ሶማሌላንድን ዕውቅና ለመስጠት እና የባህር ኃይል ቤዝ እና የንግድ ወደብ እንድትሰጥ የፈፀመችውን ስምምነት ተከትሎ ነው። በነሀሴ 2024 በተፈረመው የመከላከያ ስምምነት መሰረት፣ ግብፅ የአልሸባብን አማፂያን የሚዋጉ የሶማሊያ ልዩ ክፍሎችን በማሰልጠን እና በማስታጠቅ ላይ ትገኛለች።

ኤል-ሲሲ መርሃ ግብሩ እንደሚፋጠን እና የአለም አቀፍ የገንዘብ ድጋፍ ከተገኘ በኋላ የግብፅ ወታደሮች የአፍሪካ ህብረትን የማረጋጋት ተልዕኮ እንደሚቀላቀሉ ተናግረዋል ። ሀሰን ሼክ “የተጠናከረ የሶማሊያ ጦር ለውጭ ጣልቃገብነት በር ይዘጋዋል” በማለት ቃል ኪዳኑን በደስታ ተቀብለዋል። የግብፅና ሶማሊዬ መሪዎች በአስቸኳይ የተገናኙበት ምክንያት ኢትዮጵያ  የታላቁ ህዳሴ ግድብ ማጠናቀቋንና ለማስመረቅ በዝግጅት መሆኗን ጠቅላይ ሚኒስትር አብይ ከተናገሩ በኃላ ነው።

ኤል-ሲሲ እና ሀሰን ሼክ እንዳሉት በዚህ አመት መጨረሻ በሚደረጉ ስብሰባዎች የአረብ ሊግ እና የአፍሪካ ህብረት አባላት የኢትዮጵያ እና የሶማሊላንድ ስምምነትን ውድቅ እንዲያደርጉ ግፊት ለማድረግ አቅደዋል።  የህዳሴ ግድብ ግንባታን ማስቆም ያልቻለች ግብፅ ሶማሊያን ከኢትዮጵያ ለማጋጨት ከፍተኛ ጥረት እያደረገች ነው። ኢትዮጵያና ሶማሊያ በመካከላቸው ተፈጥሮ የነበረውን መሻከር በቱርክ አሸማጋይነት አዲስ ግንኙነት ፈጥሮ እንደነበር የሚታወስ ነው።