የዲሞክራሲ ጉዟችን ማሳያ የሆነ የዘንድሮው ምርጫ ካለፈው የተሻለና አካታች ይሆናል ሲሉ ጠቅላይ ሚኒስትር ዐቢይ አሕመድ (ዶ/ር) ገለፁ።

ኢትዮ ሞኒተር፡ 26/05/2018፡- ጠቅላይ ሚኒስትር ዐቢይ አሕመድ (ዶ/ር) ዛሬ በምክር ቤት ባደረጉት ማብራሪያ፣ የዘንድሮው ሀገራዊ ምርጫ ሰላማዊ፣ ፍትሃዊና ሁሉንም ወገን ያካተተ እንዲሆን መንግሥት በከፍተኛ ትኩረት እየሰራ መሆኑን ገልጸዋል።

ምርጫውን በሚመለከት ለኢትዮጵያ ሕዝብ ያላቸው መልስ “በውጤት እንየው” የሚል መሆኑን የጠቀሱት ጠቅላይ ሚኒስትሩ፣ ሂደቱ በሰላም እንደሚከናወንና በምርጫው የሚሳተፉ የፖለቲካ ኃይሎችም ተጠቃሚ እንደሚሆኑ በልበ ሙሉነት ተናግረዋል።

በተለይም ከምርጫው በኋላ የሚመሰረተው ፓርላማ በብዙ መልኩ የበርካታ ድምጾች ማስተጋቢያና የተለያየ ሃሳብ ያላቸው ወገኖች በነፃነት የሚከራከሩበት መድረክ እንደሚሆን ጠቅላይ ሚኒስትሩ አረጋግጠዋል።

ይህ ሂደት ኢትዮጵያ የጀመረችውን የዲሞክራሲ ግንባታ ወደ ላቀ ምዕራፍ የሚያሸጋግርና የሕዝብን ድምፅ በተግባር የሚያከብር መሆኑን አፅንኦት ሰጥተው አብራርተዋል።